കോഴിക്കോട്: പ്രായപൂർത്തിയാകാത്ത കുട്ടിക്കെതിരെ സമൂഹമാധ്യമത്തിലൂടെ ലൈംഗികാരോപണം ഉന്നയിച്ച് വിഡിയോകൾ പ്രചരിപ്പിച്ചെന്ന കേസിൽ യുവതി അറസ്റ്റിൽ. കുറ്റ്യാടി തൊട്ടിൽപ്പാലം സ്വദേശി വടക്കേതിൽ രമ്യ ഷിംജിത്ത് (36) ആണ് അറസ്റ്റിലായത്. കുട്ടിയുടെ മാതാവിനോടുള്ള വ്യക്തിവിരോധത്തെ തുടർന്ന് കുട്ടിയെ ലൈംഗികമായി അധിക്ഷേപിച്ചെന്ന പരാതിയിലാണ് പൊലീസ് നടപടി.

പോക്സോ നിയമത്തിലെ വകുപ്പുകൾക്കും ഐ.ടി. ആക്ടിലെ വിവിധ വകുപ്പുകൾക്കും കീഴിലാണ് വടക്കൻ പറവൂർ പൊലീസ് രമ്യ ഷിംജിത്തിനെതിരെ കേസെടുത്തത്. നേരത്തെ സുഹൃത്തുക്കളായിരുന്ന യുവതിയുടെ സുഹൃത്തിന്റെ മകൾക്കെതിരെയാണ് ആരോപണവിധേയമായ വിഡിയോകൾ പ്രചരിപ്പിച്ചതെന്നാണ് പൊലീസ് പറയുന്നത്. പിന്നീട് ഇരുവരും തമ്മിൽ അകന്നതിനു പിന്നാലെയാണ് കുട്ടിയെക്കുറിച്ച് വ്യാജ ലൈംഗിക ആരോപണങ്ങളുമായി രമ്യ സമൂഹമാധ്യമങ്ങളിൽ വിഡിയോകൾ പോസ്റ്റ് ചെയ്തതെന്നാണ് കേസ്.

വിഷയവുമായി ബന്ധപ്പെട്ട് നിരന്തരം വിഡിയോകൾ പുറത്തുവന്നതോടെയാണ് കുട്ടിയുടെ മാതാവ് പൊലീസിൽ പരാതി നൽകിയത്. തുടർന്ന് നടത്തിയ അന്വേഷണത്തിലാണ് പോക്സോ ഉൾപ്പെടെയുള്ള വകുപ്പുകൾ ചുമത്തി കേസെടുത്തത്.

ഇന്ന് പുലർച്ചെയാണ് കണ്ണൂർ ജില്ലയിലെ ഇരിട്ടിക്ക് സമീപമുള്ള ബന്ധുവീട്ടിൽ നിന്ന് പൊലീസ് രമ്യയെ കസ്റ്റഡിയിലെടുത്തത്. അറസ്റ്റ് ചെയ്യാൻ ആദ്യം വിസമ്മതിച്ചെങ്കിലും കോടതിയുടെ അറസ്റ്റ് വാറന്റ് പൊലീസ് കാണിച്ചതോടെയാണ് ഇവർ വഴങ്ങിയതെന്ന് പൊലീസ് പറയുന്നു.

കസ്റ്റഡിയിലെടുക്കുന്നതിനിടെ ഉണ്ടായ ബഹളവും തുടർന്ന് പൊലീസ് വാഹനത്തിൽ കൊണ്ടുപോകുന്നതിനിടെ പൊലീസിനെ ഭീഷണിപ്പെടുത്തിയതും രമ്യ തന്നെ മൊബൈൽ ഫോണിൽ ചിത്രീകരിച്ച് സമൂഹമാധ്യമ അക്കൗണ്ടിലൂടെ പുറത്തുവിട്ടതായും പൊലീസ് വ്യക്തമാക്കി. തുടർന്ന് ഇവരെ വടക്കൻ പറവൂർ പൊലീസ് സ്റ്റേഷനിലേക്ക് കൊണ്ടുപോയി.

അന്വേഷണത്തിന്റെ ഭാഗമായി സ്ത്രീകൾക്കും കുട്ടികൾക്കുമെതിരെ സമൂഹമാധ്യമങ്ങളിൽ ലൈവായി സംസാരിക്കുന്ന നിരവധി വിഡിയോകളും പൊലീസിന് ലഭിച്ചിട്ടുണ്ട്. രമ്യയുടെ ആരോപണങ്ങൾക്ക് ഇരയായതായി പറയപ്പെടുന്ന സംസ്ഥാനത്തിന്റെ വിവിധ ഭാഗങ്ങളിലുള്ള ചിലർ അടുത്തിടെ തൊട്ടിൽപ്പാലത്ത് എത്തി പ്രതിഷേധിച്ചിരുന്നതായും നാട്ടുകാർ പറയുന്നു.

കേസിൽ സമൂഹമാധ്യമങ്ങളിലൂടെ പ്രചരിപ്പിച്ച വിഡിയോകളും മറ്റ് ഡിജിറ്റൽ തെളിവുകളും ഉൾപ്പെടെ പൊലീസ് പരിശോധിച്ചുവരികയാണ്.